阿爺放完假派利是，唔理你假期外圍跌到反肚，開市兩日都力頂（起碼第一日裂口低開都撐翻上去，對得散戶住啦），完全無補跌，阿爺要親自出面維持秩序（假期不斷出利好消息），散戶醒目就先散水，走遲左可能無機會。1月外儲又跌成千億，雖然比預期少，但係大數得3萬幾億，咁少落去用乜易乾塘（唔係話貿易順差咩，點解重會少咁多）。央媽發文件容許符合條件（年收入不低於50萬，名下金融資產不低於300萬）的個人參與銀行間市場債券交易，進一步發展債券市場（個格似銀行甩唔到手搵散仔接貨多D，直情係簡陋版雷曼），銀行搵唔到客借錢都唔玩，好極有限。1月個市好成點有眼睇，新增貸款竟然大增，好多名嘴都話唔知點解，計我話呢條數唔放出街，過完年有幾多公司開門真係唔知（國內已有傳聞有公司被勸告不能倒，無錢出糧可以先拖住的講法），加上中國人要面，做得老闆點會想年尾執笠，過年重點見人；重有係企業預計好快人仔撐唔住，拿拿聲借人仔還左美金先；最怕表外貸款而家浮面，因為企業貸款增加二萬億，企業貸款八千億都多唔到，錢去左邊就自己估。香港就彈下回下，上周五期權19,000呢個禮拜就到左，其它為無乜動靜，不過啤啤熊 19,500 俾莊家掉到隨街都有，小心殺埋熊仔先落。瑞典央行下調利率，多間歐洲銀行股價跌破近年低位，當中包括意大利同希臘D銀行。沙特同阿聯酋又話要派地面部隊去敘利亞，D油咁都彈唔起真係前途似咁；幾大巨頭坐低傾減產又唔成事，睇怕老美好快有能源公司頂唔住，大盤跳水又大把平貨執。

呢期輪到隻和美醫療1509，目前中國最大婦產科私家醫院，旗下11間醫院分佈7個城市，當中北京同深圳醫院收費最高，生仔套餐5至6萬人仔，坐月就盛惠5萬8（又真係幾貴）；整體員工數目接近1,400人。估計15年全年業績放緩，原因係國內人不喜歡羊年生B，16年業績應該會有明顯增長；二胎政策落實執行，很大程度上會助推業績，加上現時病床使用率只有不到60%，年底會有新醫院投入服務，業務增長唔會造成人手同配套上壓力。集團亦計劃年中全面加價5至10%，預期可以改善20%盈利表現。要考慮係集團客戶以中產階層為主，二胎政策能起多少催化作用言之尚早（有錢早就生左，未生就政策放開都不一定生）；由於人口政策的影響，預計每年出生人數只會有序下降，唯一可能出現爆發期只有明年，之後日子就要同其它公立醫院，私立醫院爭客，結果亦係估唔到。舊年 7.55 IPO後最高見過8.4，之後就潛水，可以趁大市回調時在5.8附近買入，目標價7元。

下星期講隻必瘦站1830。

讀者有任何交流的，可以發電郵至 fundsniper@yeah.net，大家多作交流。（以上觀點僅為個人對市場的看法，並非任何投資勸誘或建議。）

------------------

🏵️《九評》20周年👉🏻 https://hk.epochtimes.com/category/專題/退黨大潮

💎成為會員 📧訂閱電子報
https://hk.epochtimes.com/subscribe

🔔下載大紀元App 接收即時新聞通知
🍎iOS：https://bit.ly/epochhkios
🤖Android：https://bit.ly/epochhkand